Форбес сэтгүүлийн нийтлэлч Виллиам Арруда нь жил бүр карьераа өсгөх, ажлын байран дээр илүү их амжилт, сэтгэл ханамжийг авчрах хувь хүний брэндингийн топ нууцуудыг хуваалцдаг билээ. Тэгвэл тэрээр 2025 оны карьер төлөвлөгөөндөө дараах есөн чухал чиг хандлагыг анхаарч үзэхийг зөвлөжээ.
Энэ жилийн чиг хандлагууд нь таны бусдаас ялгарах давуу талуудыг тодотгон харуулах, өөрт тохирсон ажлыг болон суралцах арга барилыг бий болгоход илүү чиглэсэн байна. Эдгээр аргуудыг ашиглан карьераа нэмэгдүүлээрэй
- Хосолмол ажлын загвар: Ажлын уян хатан байдал (гэрээсээ ажиллах) ба оффист ажиллах – 2025 онд гэрээсээ ажиллах(цахимаар ажиллах), оффист ажиллах гэсэн хосолмол ажлын арга нийтэд дэлгэрч байна. Компанийн удирдлагууд ажилтнуудынхаа ихэнх цагийг оффист өнгөрүүлэхийг шаардаж байгаа бол нөгөө талаас ажилтнууд уян хатан, алсын зайны ажлын боломжийг шаардаж эхэлж байна. Ажил олгогчдын зүгээс тавьж буй уг шаардлага нэмэгдэх тусам хоорондын зөрчил нэмэгдэнэ гэж үзжээ.
- Олон чиглэлээр ажиллах: Олон карьерын хэв маяг- Олон чиглэлээр ажиллах буюу нэгэн зэрэг олон ажил, төсөлд оролцох нь сүүлийн жилүүдэд ихээхэн эрсдэлтэй болж байна. Хэдийгээр уян хатан байдал, орлогын олон эх үүсвэрийг бий болгох давуу талтай боловч ажлаас халшрах шинжийг нэмэгдүүлэх болон ажлын байрны тогтвортой байдалд томоохон эрсдэлүүдийг бий болгож байна. 2025 онд энэ хандлага улам бүр нэмэгдэх төлөвтэй байгаа ба байгууллагууд ажилчдынхаа олон чиглэлээр ажиллах байдлыг дэмжихийн тулд уламжлалт ажлын загвараа өөрчлөх шаардлагатай болж болзошгүй юм гэж үзжээ..
- Олон талт оролцооны шинэ хандлага- 2025 онд ажлын байранд уламжлалт хүчин зүйлс болох арьс өнгө, угсаа гаралд төвлөрөхөөс илүү хувь хүний онцгой ур чадвар, үзэл бодол, туршлагыг үнэлэхэд төвлөрнө.
- Аудио болон подкаст- Аудио контент нь үнэ цэнээ хадгалсан хэвээр байна. 2024 оны байдлаар АНУ-д 12 ба түүнээс дээш насны иргэдийн 47% нь сард дор хаяж нэг удаа подкаст сонсдог гэж мэдээлсэн нь цар тахлын үеийн (2021 он) 41%-тай харьцуулахад ихээхэн өссөн харагдаж байна. Үүний зэрэгцээ дуу хоолойны технологи нь хувь хүний брэндийн чухал хэсэг болж, хиймэл оюун ухаанд суурилсан дуу хоолойны хэрэгслүүд нь менторшип, манлайлал, хүний дуу хоолойд тулгуурласан сургалт хөгжлийг дэмжих замаар карьерын өсөлтийг хурдасгана.
- Видео контент- 2025 онд видео контент хувь хүний брэнд хөгжүүлэх хамгийн чухал хэрэгсэл хэвээр байна. Жишээлбэл, LinkedIn дээр видео постууд текст суурьтай нийтлэлээс илүү өндөр хандалттай байдаг. Өндөр чанартай зураглал, өгүүлэмжтэй видео контент нь үзэгчдийн анхаарлыг татах гол түлхүүр болох бөгөөд видеог сайн ашиглаж чадсан хүмүүс илүү тодорч, байгууллагууд ажилтнуудаа видео контент бүтээх ур чадварт сургах нь нэмэгдэнэ гэж үзэж байна.
- Ажлын байрны орчныг бүрдүүлэх – AI болон дэвшилтэт технологийн ачаар компаниуд ажилтнуудынхаа карьерын зорилгод тохирсон ажлын туршлагыг санал болгож байна. Mastercard-ийн Build Your Own Career, Unilever-ийн Flex Experiences зэрэг хөтөлбөрүүд нь ажилчдад өсөлтөө удирдах, олон боломжийг судлах нөхцөлийг бүрдүүлж байна. Энэ хандлага нь “нэг загвар бүгдэд тохирно” гэх хэв маягийг халж байгууллагууд ажилчдынхаа ур чадвар, карьерын зорилгыг дэмжих хувийн төлөвлөгөө боловсруулж, хэрэгжүүлэхэд анхаарал хандуулах болно гэж үзжээ.
- Сургалтын шинэ хандлага- Цар тахлын үед сургалтууд цахим хэлбэрт шилжиж, суралцагчдад уян хатан байдлыг бий болгож чадсан ч оролцоот, хүртээмжтэй байдал асуудал болон гарч ирэв. Maven зэрэг компаниуд уг асуудлыг түрүүлж харж, хамт олны оролцоог чухалчилсан сургалтын хөтөлбөрүүдийг санал болгож байна. 2025 онд компаниуд цахим сургалтын уян хатан байдлыг амьд, харилцан үйлчлэлтэй сургалттай хосолсон загварыг нэвтрүүлж, илүү үр дүнтэй, бодитой сургалтын орчныг бүрдүүлэхэд анхаарах болно.
- Хиймэл оюун ухааны эерэг өсөлт- 2025 онд хиймэл оюун ухаан (AI) нь хувь хүний брэндийг бүтээх болон мэргэжлийн ур чадварыг хөгжүүлэх гол хүчин зүйл хэвээр байх болно. AI-д суурилсан хэрэгслүүд ажлын урсгалыг хялбарчилж, сургалтуудыг хувь хүнд тохируулан оновчтой болгохын зэрэгцээ контент бүтээх, үзэгчдийг татах шинэлэг шийдлүүдийг бий болгож байна. AI-г үр дүнтэй ашигласнаар бүтээмжээ нэмэгдүүлж, харилцаа тогтоох, брэндээ өргөжүүлэхэд илүү их цаг гаргах боломжтой болжээ.
- Хөгжилтэй байдлыг нэмэгдүүлэх үе- 2025 онд ажлын соёл болон хувь хүний брэнд нь хөгжилтэй байдал руу анхаарлаа хандуулах болно. Тархи судлалын судалгаагаар хөгжилтэй байдал нь хүмүүсийн оролцоог нэмэгдүүлж, бүтээмжийг сайжруулдаг болохыг баталсан. Компаниуд ажилчдынхаа орчинд хөгжилтэй хандлагыг нэмэгдүүлж эхэлсэн бол боловсрол, карьерын байгууллагууд платформдоо хөгжилтэй тоглоом, элементүүдийг шингээж эхэлж байна. Контентийн өрсөлдөөнт орчинд мэргэжилтнүүд илүү хөгжилтэй, илүү сонирхол татахуйц контент бүтээж, брэнд болон дагагчдынхаа хүрээг тэлэх болно.
Эх сурвалж: 9 Personal Branding Trends For 2025