Archive for the
‘Номын хураангуй’ Category

Доорх номын жагсаалт нь хувь хүний хөгжлийн хамгийн шилдэг гэгдэх номуудаас бүрдсэн бөгөөд жагсаалтыг гаргахдаа олон манлайлагч нарын зөвлөгөө, шилдэг гэгдэх олон улсын сэтгүүлүүдэд ихээр иш татагдсан байдлыг харгалзан сонголоо. Жагсаалтад, хувь хүний хөгжлийн номуудын онолын суурь болсон боловсрол, манлайлал, өөрийгөө хэрхэн дайчилж амжилтад хүрэх тухай номууд багтсан болно.

1. “The Success Principles”

Jack Canfield-ийн бичсэн энэхүү өөртөө-туслах /self-help/ ном нь амьдралаа өөрчилж, амжилтад хүрэх аргуудыг зааж өгсөн байдаг. Хэрвээ та өөрийнхөө амьдралыг өөрчлөх, амжилтад хүрэхэд тань туслах ганцхан шилдэг номыг хайж байгаа бол гагцхүү энэ номыг л уншаарай.

Номын сул тал: Магадгүй номонд дурдагдсан зарим санаанууд нь бусад хувь хүний хөгжлийн номуудтай төстэй учраас уншигч таныг бага зэрэг уйдааж магад.

2. “Think and Grow Rich”

Napoleon Hill-ийн бичсэн “Think and Grow Rich” ном нь амжилтад хүрсэн олон хүмүүсийн ширээний ном болж байсан. Анх бичигдсэн өдрөөсөө хойш 80 гаран жил өнгөрсөн ч өнөөгийн залуучуудын өврийн ном болж хүний дотоод мөн чанар, хувь хүний хөгжил, амжилтын тухай өгүүлдэг энэ номыг заавал уншаарай.

3. “The Power of Positive thinking” 

Амжилтад хүрсэн олон хүмүүс “Хандлага” бол амжилтын хамгийн чухал хэсэг гэдэг. Энэхүү номоор зохиолч Norman Vincent Peale эерэгээр сэтгэх нь амжилтыг шууд бий болгодоггүй харин эерэгээр ЗӨВ сэтгэж чадах нь хүнийг хэрхэн амжилт руу чиглүүлдэг тухай өгүүлдэг.

Номын сул тал: Энэхүү ном нь зарим нэг талаараа хэт их шашины (secret; god) шинж чанартай гэсэн шүүмжлэлүүдийг авдаг байна. Гэвч авах гээхийн ухаанаар хандаж чадвал энэхүү номоор дамжуулан хандлагаа өөрчлөх боломжтой.

4. “Outliers: The story of success” 

Malcolm Gladwell-ийн бичсэн энэхүү ном нь шинжлэх ухааны талаас амжилтад нөлөөлдөг зүйлсийг тодорхойлон бичсэн байдгаараа онцлогтой. Энэхүү номонд бусад хувь хүний хөгжлийн номууд шиг амжилтад хүрэхийн тулд хийх ёстой зүйлсийн жагсаалт байдаггүй. Харин номын хэсэг бүрээр дамжуулан амжилтанд аз, хандлага, чадвар нөлөөлдөггүй харин өөрийн чадварт зориулж буй ЦАГ гэх ганц хэмжүүр л нөлөөлдөг тухай өгүүлнэ.

Холбоотой нийтлэл: “ЯАГААД ТА ӨДӨР БҮР УНШИХ ШААРДЛАГАТАЙ ВЭ? НОМ УНШИХЫН 10 АШИГТАЙ ТАЛ”.

Манай сайт дээр гарсан зөвлөгөө, мэдээллийг цаг тухай бүрт нь и-мэйлээр авч байхыг хүсвэл ЭНД дарж бүртгүүлээрэй.

“Энгийнээр тайлбарлаж чадахгүй байгаа зүйлээ чи хангалттай мэддэггүй гэсэн үг” гэж алдарт эрдэмтэн Алберт Эйнштэйн хэлсэн байдаг. Онлайн худалдааны өсөлтөнд чухал хувь нэмэр оруулсан ПэйПал /PayPal/-г үүсгэн байгуулагчидын нэг Питер Тиэл болон хуулийн судалгааны стартап Жүдиката компанийн үүсгэн байгуулагч Блэйк Мастерс нарын хамтын бүтээл “ТЭГ-ээс НЭГ рүү тэмүүлэх нь” ном нь гарааны бизнес, бүтээгдэхүүн, өрсөлдөөн болон амжилтын талаарх олон хүндхэн сэвдүүдийг маш ойлгомжтой тайлбарлажээ. Хэзээ нэгэн цагт өөрийн хувийн бизнесийг эрхэлж түүнийгээ удирдан зохион байгуулж, амжилттай ажлуулахыг мөрөөдөж байгаагүй хүн байхгүй биз. Зарим нэг маань аль хэдийн бизнесээ эхлүүлэн алдаанаасаа суралцан хөгжиж буй гэдэгт итгэлтэй байна. Энэ удаагийн сонгосон ном маань яг л дээр тодорхойлсон хүмүүст зориулсан хэрэвээ чи бизнес эрхлэх гэж байгаа бол бусдыг дуурайсан биш өөрийн цоо шинэ бусдын эзлээгүй орон зайд буюу байхгүй 0 зүйлийг 1 болгон ажилбал илүү амжилт олно гэдгийг жишээ, баримттайгаар зөвлөжээ.
Ямар ч төрлийн бизнес эрхлэх байсан доорх шалгуур асуултыг асуугаад бүгдэд нь онцгой хариулт өгч чадаж байвал та яг одоо өөрийн бизнесээ хийх цаг нь болсон байна гэж үзэж болно. Үүнд:

1. Инженерингийн шалгуур асуулт: Аажмаар өсөж хөгжих бус, онцгой нээлт болсон технологийг бий болгож чадаж байна уу?
2. Цаг хугацааны шалгуур асуулт: Тухайн бизнесийг эхлүүлэхэд тохиромжтой цаг яг одоо мөн үү?
3. Монополь байдлын шалгуур асуулт: Жижиг зах зээлийн дийлэнх хувийг эхэлсэн даруйдаа эзлэх боломжтой юу?
4. Хүн хүчний шалгуур асуулт: Зөв баг бүрдэж чадсан уу?
5. Түгээлтийн шалгуур асуулт: Зөвхөн бүтээгдэхүүн үйлчилгээг бий болгохоос гадна, түүнийгээ түгээх арга замыг олсон уу?
6. Бат бөх байдлын шалгуур асуулт: Ойрын 10 болон 20 жилдээ зах зээлд эзэлсэн байр сууриа баттай хадгалах боломж бидэнд бий юу?
7. Нууцын шалгуур асуулт: Бусдын олж харж чадаагүй маш онцгой боломжийг та олж харж чадсан уу?

За дээрх асуултуудыг бүгдийг нь амжилттай хариулаад цааш бизнесээ эхлүүлэхээр зорьсон бол мөн доорх 4-н зөвлөлгөөг анхааралтай дагаарай. Үүнд:

1. Аар саар, жижиг зүйлээр оролдсоноос томоохон зүйл рүү зориглоод орох нь зүйтэй
– Санаагаа олсон бол 1-2 жилд бусад хүмүүс түүнийг чинь дуурайчихааргүй, хичээл зүтгэлийн тань дараа үнэ цэнэ өгөхөөр байвал сайн
2. Огт төлөвлөхгүй байснаас, маруухан төлөвлөгөөтэй байсан нь дээр
– Бид хэт өөдрөг байдгаас юунд хүрэх, яах гэж байгаагаа огтхон төлөвлөхгүй бүх зүйл аяндаа бүтэх мэт аашилдаг нь үнэхээр тэнэглэл юм.
3. Өрсөлдөөнт зах зээл ашгийг үгүй хийдэг
– Өрсөлдөөн хамгийн бага байгаа газар л ашиг гэсэн ойлголт байдаг. Тиймээс монополь бизнесүүд ашигтай байгаагаа нуухын тулд өөрсдийгөө жижиг байгаа мэтээр хэрэглэгчидэд ойлгоуулдаг. Харин төгс өрсөлдөөнд буй компаниуд өөрийгөө монополь болсон хамгийн 1 номерын сонголт шүү гэдгийг харилцагчидад итгүүлэхийг хүсдэг тул монополь мэт төсөөллийг үүсгэхийг хичээдэг.
4. Бүтээгдэхүүн, борлуулалтын аль аль нь чухал ач холбогдолтой
– Инженерүүд болон бүтээгдэхүүн хөгжүүлэгчид гол анхааралаа бүтээгдэхүүнээ төгс болгох тал дээр хэт анхаарч борлуулалтаа хаядаг. Харин борлуулагчид эсрэгээрээ оргүй хоосон, эсвэл зүгээр л харагдах байдлыг өөрчилсөн зүйлийг үнэд хүргэн зарахыг хичээдэг. Тэхдээ бүтээгдэхүүн, борлуулалт хоёрыг зэрэг анхаарч байж л амжилтанд хүрэх боломжтой.

Уншсан номноосоо за яг энэ хэсгийг нь уншчихаарай, ерөнхий товчихондоо ийм тийм байсан гээд хэлээд заагаад өгөхөөр цаг хугацаа хэмнэсэн сайхан үйл байдаг. Тиймээс миний хувьд энэхүү номноос хамгийн хэрэгтэй байх болов уу гэсэн санаануудыг доорх байдлаар тодорхойллоо. Үүнд:

1. Хүн болгон борлуулагч. Бүгд л амьдралынхаа туршид, кареерынхаа туршид өөрийгөө борлуулж амьдардаг. Борлуулалтын мэргэжилтэнг захиалгын мэргэжилтэн, бизнес хөгжлийн мэргэжилтэн, даатгалын төлөөлөгч, сургалтын менежер, хөрөнгө оруулалтын зөвлөх, өөрийгөө зардаг хүмүүсийг улс төрч гэх мэтээр давхар нэршлээр нэрлэдэг нь борлуулалт хийдгээ мэдэгдэх хүсэлтэй хүн цөөн байдагтай холбоотой. Жүжиглэх ур чадварын адил борлуулалт далд байх тусмаа амжилт олдог.
2. Чадварлаг баг бүрдүүлэх. Зөвхөн ур чадвартай гэх тодотголоор хамт урагшлах чин хүсэлгүй хүмүүсээр биш зорилгынхоо төлөө тууштай тэмцэх, инженерийн буюу тухайн бизнесийнхээ салбарын талаар гүн мэдлэгтэй дээрээс нь борлуулах ур чадвартай хүмүүсээр багаа бүрдүүлбэл амжилт ойрхон.
3. Машин хэзээ ч хүнийг орлох боломжгүй. Өнөөдөр бидний хамгийн ухаантай гэх хүмүүсээс хэд дахин илүүг тооцоолох чадвартай машин буюу компьютерүүд бий болсон. Гэхдээ машин, технологи нь зөвхөн хүнд туслах зориулалттай, хүнд ашиг тусаа хүртээхээр бүтээгдсэн тул машинтай өрсөлдөж биш түүнийг яаж өөртөө ашигтайгаар ашиглах бэ гэдэг дээр толгойгоо ажлуулбал цаашид амжилттай байх боломжтой.

Өмнөх удаагийн цувралаар бид тус номын зохиогчид болох дэлхийн хамгийн шилдэг бизнесийн сургуулиудын жагсаалтанд тогтмол дээгүүр бичигддэг INSEAD-ын профессорууд бизнес эрхлэгчид болон шинээр бизнес эхлэхээр зорьж буй хэн ч бай зэрлэг капитализмийн сонгодог бүтээгдэхүүн болох цусан улаан өрсөлдөөнөөс түдгэлзэж, зах хязгааргүй номин хөх далайн хаа нэгтээ нуугдаж буй хэрэглэгчдэд тань шинэ үнэ цэнэ (value) нэмэх шинэ санаа (innovation)-г бүтээгдэхүүн, үйлчилгээндээ шингээх замаар хөх далайн стратегийг хэрэгжүүлэхийг зөвлөж буйг хүргэсэн. Энэ удаад бид тус номонд тайлбарласан бизнесийн гол ухагдахуунуудаас нэмж хоёрыг танилцуулъя.

НЭГТ: Таны зах зээлд нэвтрүүлэхээр зэхэж буй бүтээгдэхүүн, үйлчилгээ хөх далайн стратегитэй нийцэж байгаа эсэхэд дүн шинжилгээ хийх схем.

Энэхүү схемт үзүүлсэнчлэн аливаа бизнес эрхлэгч бизнесийн санаагаа бодитоор хэрэгжүүлэхээр цаг, мөнгө, хүч хөдөлмөрөө зарцуулахаасаа өмнө дараах дөрвөн асуудлын хүрээнд дүн шинжилгээ хийх хэрэгтэй. Үүнд:

– Худалдан авагчийн хэрэгцээ (Buyer Utility),
– Үнэ (Price),
– Өртөг зардал (Cost),
– Бодитоор хэрэгжүүлэх боломж (Adoption) зэрэг багтана.

Эдгээрийг тус бүрт нь авч үзье.
1. Таны санаачилсан бизнес худалдан авагчдад өөр зүйлээр орлуулашгүй хэрэгцээг бий болгож чадах уу? Үгүй бол бизнесийн санаагаа дахин тунгаагаарай. Тийм бол дараагийн асуултанд хариулаарай.
2. Таны санал болгож байгаа үнэ худалдан авагчдын дийлэнх хэсэгт хүртээмжтэй байж чадах уу? Үгүй бол тогтоосон үнээ дахин тунгаагаарай. Тийм бол дараагийн асуултанд хариулаарай.
3. Таны санал болгож буй үнэ танай компанид үйлдвэрлэлийн зардлаа хасаад цаана нь боломжийн ашиг гарахаар хэмжээнд тогтож чадаж байна уу? Та бүтээгдэхүүн, үйлчилгээнийхээ үнийг тогтоохдоо зөвхөн зардалд суурилах нь туйлын буруу шүү. Мөн худалдан авагчдын дийлэнх хэсэгт хүртээмжтэй байлгах гээд үнээ зохиомлоор бага тогтоож, ингэхийн тулд бүтээгдэхүүн, үйлчилгээнийхээ чанарыг бууруулах тухай бодож байгаа бол бас л буруу. Үүний оронд та бизнесийн санаагаа дахин бодож үзээрэй. Харин таны худалдан авагчдад санал болгохоор зорьж буй үнэ, таныг бүтээгдэхүүн, үйлчилгээгээ чанартай үйлдвэрлэхийн зэрэгцээ бизнестээ ч боломжийн ашиг авчрахаар хэмжээнд тогтож чадаж байвал дараагийн асуултанд хариулаарай.
4. Та болон танай компани бизнесийн санаагаа шууд бодитоор хэрэгжүүлэх чадавх, чадамжтай юу? Хэдийгээр таны бизнесийн санаа эхний гурван шалгуурыг давсан ч гэсэн, яг бодит байдал дээр таньд тухайн санаагаа бодитоор хэрэгжүүлэхэд тань шаардлагатай хүн хүч, техник технологи, хөрөнгө мөнгө дутмаг байгаа юм биш биз? Тийм бол энэ мэт асуудлуудаа эхэлж шийдсэн нь зөв алхам болно шүү.

Дээрх дөрвөн асуудлын хүрээнд өөрийн бизнесийн санаандаа дүн шинжилгээ хийж, хүрэхээр зорьж буй хэрэглэгчиддээ шинэ үнэ цэнийг болгох, шинэлэг бүтээгдэхүүн, үйлчилгээ хүргэх замаар хөх далайн стратегийг хэрэгжүүлж чадаж байгаа эсэхээ нягтлаад үзээрэй.

ХОЁРТ: Хэрэглэгчдээ таньж мэдэх аргачлал.

Номын зохиогчдын онцолж буйгаар цусан улаан өрсөлдөөнийг үүсгэдэг бас нэгэн томоохон шалтгаан бол бизнес эрхлэгчид юмуу бизнес эрхлэхээр завдагчид санал болгож/болгох гэж буй бүтээгдэхүүн, үйлчилгээг нь аль хэдийн хэрэглэдэг болсон зах зээлийн хэсгийг л судлаад байхаас, хэрэглэхгүй байгаа зах зээлийн бусад хэсгийг төдийлэн судалдаггүй байна.

Номын зохиогчид хөх далайн стратегийг хэрэгжүүлэн, хэрэглэгчдийнхээ хүрээг амжилттай тэлж чадсан хэд хэдэн компанийг жишээ болгон татсаны нэг нь алдарт Apple компани байв. “Хэрэглэгчид юу хүсч байгаагаа мэддэггүй гэх” алдарт ишлэлийг Apple компанийг үүсгэн байгуулагч Steve Jobs хэлсэн ба үүнийгээ ч бодит байдалд утгаар нь бататган харуулж чадсан. Тэд комьпютерийн зах зээлд хөнгөн, үзэмжтэй зөөврийн комьпютер үйлдвэрлэлээрээ хувьсал хийж комьпютерийг зөвхөн хэрэглээ талаас нь бус, гангараа, хувь хүнийг илтгэх илрэл болтол хөгжүүлж чадсан. Брэнд хөгжүүлэлтийн дээрх мэт шинэлэг ойлголтуудыг iPhone, iPad, iWatch зэрэг шинэ бүтээгдэхүүн бүртээ шингээж, хэрэглэгчдэд ямар нэгэн нэмэлт үнэ цэнийг бий болгосноороо Apple компани хамгийн өрсөлдөөн ихтэй гэгддэг техник, технологийн салбарт 40 жилийн турш тэргүүлсээр яваа билээ. Иймээс ч хэрэглэгчид Apple компанийн шинэ бүтээгдэхүүн бүрийг тэсэн ядан хүлээж, хонон өнжин оочерлон авдаг бизээ.

Таны бизнес жижиг, том, ашгийн төлөө юмуу ашгийн бус аль нь ч бай өөрийн зах зээл/үйл ажиллагааны хэрэглэгчид төдийгүй хэрэглэгч болох боломжтой бусад хэсгүүдийг давхар судлан, таньж мэдсэний дүнд хэрэглэгчдэд шинэ үнэ цэнийг өгөх, шинэлэг бүтээгдэхүүн, үйлчилгээнүүдийг шаардлагатай үед санал болгож чадаж байвал таны бизнес тогтвортой, амжилттай оршин тогтнох боломжтой гэж “Хөх далайн стратеги” номын зохиогчид зөвлөж байна.

Та бүхэнд амжилт хүсье!

Дэлхийн бизнесийн хамгийн шилдэг сургуулиудын нэг Франц улсаас үүсэлтэй INSEAD – ын профессоруудын 20 гаран жилийн судалгаа, шинжилгээний дүнд бүтсэн “Blue Ocean Strategy” буюу “Хөх далайн стратеги” номын хураангуйг та бүхэнд хүргэе. Олон оронд хамгийн олон хувь борлогдсон шилдэг номын жагсаалтанд тэргүүлсэн энэхүү номыг ганцхан удаагийн хураангуй бичвэрээр хүргэхэд хэтэрхий жулдах учир хэд хэдэн цуврал болгон хүргэхээр боллоо.

Энэхүү ном нь жижиг, дунд, мега гээд ямар ч түвшний бизнес эрхлэгчид төдийгүй үндэсний хэмжээний стратеги, төлөвлөгөө боловсруулан, хэрэгжүүлэхэд тус болох аргачлалуудыг танилцуулан, тайлбарласнаараа гол давуу талтай. Иймд номын зохиогчид эдгээр аргачлалуудыг өөрсдийн www.blueoceanstrategy.com хуудсанд танилцуулсны дагуу номын гол санаануудыг хураангуйлан хүргэе.

1. Цусан улаан далай ба Номин хөх далай
Бидний амьдарч буй капиталист нийгэмд бизнесүүдийн баримталж ирсэн үндсэн зарчмуудын нэг нь дайн байлдаанаар бол амь өрссөн цусан улаан тулаанд өрсөлдөгчдөө ялан дийлж, өөрийн бизнесээ ашигтай ажиллуулах явдал байсаар ирсэн. Гэтэл 21-р зуунд аливаа бизнес тухайн мөчид ашигтай байна гэдэг нь тус бизнесийн амжилтын гол шалгуур биш харин аливаа бизнес хэр нэр хүндтэй, тогтвортой өсөлттэй, ашигаа нэмэгдүүлж чадаж байна гэдэг тус бизнесийн амжилтын гол үзүүлэлтүүд байх болжээ.

Үүнийг номын зохиогчид бизнесийн уламжлалт улаан стратегийг халж, аль хэдийн өрсөлдөгчдөөр дүүрсэн зах зээлд бус зах хязгааргүй хөх далайн хаа нэгтээ нуугдаж буй боломжийг нээн илрүүлж хэрэглэгчдэд шинэ үнэ цэнэ, давуу талыг мэдрүүлэх шинэ төрлийн эрэлт хэрэгцээг бий болгож, цуст өрсөлдөөнөөс зайлсхийхийг зөвлөжээ.
Ийм бизнесийн жишээ нь Канад улсаас үүсэлтэй CirqueDuSoleil энтертаймэнт бизнес юм. Тэд 1980-аад онд алиалагч, амьтдын үзүүлбэр зэрэг улиг болсон үзүүлбэрүүдээс хэтрэхээ больж үзэгчдээ бусад төрлийн энтертаймэнт бизнесүүдэд алдаж байсан циркийн үзүүлбэрүүдийг цоо шинэ, үзэгчдийг байлдан дагуулж, алмайруулсан үзүүлбэрүүдээр сольж, энтертаймэнт бизнест урьд өмнө үзэгдээгүй шинэ урсгалыг бий болгосон. Түүгээр зогсохгүй тэд аль ч үеийн үзэгчдийн сонирхлыг татахын тулд одоо ч үзвэрүүдээ шинэчилж, тайз засалтаа урьд урьдаас илүү сайжруулсаар байна.
2. Дөрвөн үйлдэлт шинжилгээ
Аливаа бизнесийг шинээр эхлүүлэх юмуу оршин буй бизнесийг өргөжүүлэх, зогсонги байдлаас нь гаргахын тулд бизнес эрхлэгчид дараах дөрвөн үйлдэл буюу асуултын дагуу өөрийн бизнестээ дүн шинжилгээ хийж, стратегиэ тодорхойлох юмуу шинэчлэх замаар шинэ үнэ цэнийг хэрэглэгчдэд санал болгох хэрэгтэй.

Эдгээр дөрвөн үйлдлийг гүйцэтгэхийн тулд та өөртөө тавих асуултууд:

1. Юуг бизнес эрхлэх салбарынхаа стандарт дунджаас хамаагүй илүү байлгах вэ?
2. Бизнес эрхлэх салбарт чинь урьд нь хэрэглэгчдэд санал болгож байгаагүй юуг шинээр бий болгох хэрэгтэй вэ?
3. Юуг бизнес эрхлэх салбарынхаа стандарт дунджаас хамаагүй бага байлгах вэ?
4. Бизнес эрхлэх салбарт чинь өрсөлдөөнийг хамгийн их өдөөдөг юуг хасах хэрэгтэй вэ?

Тухайлбал дээр дурдсан CirqueDeSoleil дээр хийгдсэн дөрвөн үйлдэлт шинжилгээний үр дүн дараах байдалтай байна:
1. Тэд уламжлалт циркийн шоунууд болдог дундаж газруудаас хамаагүй илүү багтаамжтай, үзэмжтэй, тансаг газруудад шоугаа зохион байгуулах болсон.
2. Тэд үзүүлбэрийн шинэ сэдвүүд, хэд хэдэн тавилтууд, сайжруулсан орчин, хөгжим бүжгийн гайхам тоглолтуудыг шинээр бий болгосон.
3. Тэд өөрсдийн үзүүлбэрүүддээ хошин шог, аюултай юмуу амь өрссөн үзүүлбэрүүдийг уламжлалт циркийн үзүүлбэрүүдээс хамаагүй бага хэмжээнд оруулсан.
4. Тэд салбартаа л од гэгддэг жүжигчид, маллахад үнэтэй амьтдын үзүүлбэрүүд, тоглолтын дундуур үзэгчдэд ундаа, амттан зарах, тоглолтын хэд хэдэн газартай байх зэрэг уламжлалт циркт тогтсон цөөнгүй жаягуудыг хассан.

“Хөх далайн стратеги” номын хураангуй болон дараа дараагийн “дэлхийн шилдэг номын хураангуй” цувралын маань бичвэр нийтлэгдмэгц алдалгүй уншихыг хүсвэл манай сайтын мэдээлэл авах хэсэгт цахим хаягаа бүртгүүлээрэй!