Author Archive

Home / Author's Article(s) / administrator

June 27, 2016

Админ

Educated highlights

CV БИЧИХДЭЭ ХЭЗЭЭ Ч ГАРГАЖ БОЛОХГҮЙ 9 АЛДАА

CV БИЧИХДЭЭ ХЭЗЭЭ Ч ГАРГАЖ БОЛОХГҮЙ 9 АЛДАА 0

“Ном бол ертөнцийг харах толь” гэдэг шиг таныг бусдад, ялангуяа ажил олгогчдод таниулах толь бол CV билээ. Англиар CV бичих, Монголоор анкет бөглөх харагдах байдлын хувьд ялгаатай ч, агуулгын хувьд төстэй. Иймд өөрийн CV бичих/анкет бөглөхдөө гаргаж болохгүй 9 алдааг CareerBuilder-ын зөвлөх Matt Tarpey ингэж тодорхойлжээ.

1. Үг, үсгийн алдаа гаргах: CareerBuilder-ээс 2013 онд явуулсан судалгаанд оролцогч ажил олгогчдын 58% нь үг, үсгийн алдаатай анкетыг шууд л жагсаалтаас хасдаг гэжээ.
2. Буруу мэдээлэл өгөх: Хуучин ажлын газрынхаа утас, хашиж байсан албан тушаал зэргээ худал, буруу бичиж болохгүй.
3. Яг адилхан бөглөсөн анкет өөр өөр газруудад өгөх: Анкет бөглөж буй албан байгууллагууд чинь өөр, өөр ажил үүргийн хуваарьт өөр, өөр албан тушаал эрхлэх ажилтан хайж байгаа учир тэдний хүсэл, шаардлагад нийцүүлэн өөрийн туршлага, чадварынхаа алийг нь хаана тодотгох вэ гэдгээ тооцоол.
4. Харагдах байдалд хэт их анхаарах: Өөрийн туршлага, чадвараа илэрхийлэх үгийн сонголтондоо л анхаарлаа хандуул. Ямар үсгийн фонтоор, ямар өнгөтэй хайрцаганд бичих гэх мэт харагдах байдалд их ач холбогдол өгөх хэрэггүй.
5. Тодорхой биш байх: Хаана ямар амжилт хэзээ гаргав, хуучин ажилдаа яг яаж хувь нэмэр оруулсан зэргээ аль болох тодорхой бич. (Жич: Энэ мэт чухал мэдээлэл авахын тулд манай зарим ажил олгогчид уламжлалт анкетаа шинэчлэх шаардлагатай санагддаг.)
6. Нэг хуудсанд хэтэрхий олон үг бичих: Дээр дурдсан судалгаанд оролцогчдын 66% нь дөнгөж их сургуулиа төгсөгчид нэг хуудсаас илүүгүй, 77% нь тодорхой ажлын туршлагатай өргөдөл гаргагчдын CV хоёр хуудаснаас багагүй байх нь зохистой гэж үзжээ.
7. Ажилласан хугацаагаа тодорхой бичихгүй байх: Хүүхэд төрүүлсэн зэрэг шалтгаанаар багагүй хугацаанд ажил хийлгүй завсардсан бол түүнийгээ анкетандаа бодитоор нь тодорхой тусгаж байх хэрэгтэй.
8. Өөрийн чадваруудаа бичихгүй байх: Хаана хэдэн жил ажилласан гэдгээс илүү яг ямар чадварыг давуу эзэмшсэн чинь ажил олгогчдод илүүтэй чухал мэдээлэл юм. Тэгэхээр жишээлбэл “Хэлэлцээ хийх” зэрэг чадваруудаа гарчиг болгон доор нь энэ чадвараа ямар байдлаар ашигласнаа жагсаах байдлаар харуулж болно.
9. Тухайн ажилд орсноор өөрт чинь ямар хэрэгтэй гэдэгт анхаарах: Үүний оронд тухайн ажилд чамайг авснаар тэр байгууллагад чи яаж хувь нэмрээ оруулах вэ гэдгийг тодотгож өг.

 

Эх сурвалж: “9 Glaring Résumé Mistakes Not to Make”, Christine Ryan Jyoti, Learn Vest

June 26, 2016

Админ

PeopleWorkInternational SMEs

УДИРДЛАГАА УДИРДАХ УХААН БУЮУ 3У

УДИРДЛАГАА УДИРДАХ УХААН БУЮУ 3У 0

Хуучин ажлын маань нэг ах хүү “Нөхрийн ажил бүтвэл, миний ажил бүтнэ” гээд л найз нөхдийнхөө ажилд их л өөриймсөг хандан тусладаг байсансан. Мэдээж энэ тохиолдолд тэр хүн ийнхүү сэтгэл, зүтгэлээ гаргах найз нөхдөө санаа нийлэх, итгэл даах зэрэг янз бүрийн л шалгуураар сонгодог байлгүй. Харин бидний сонголтоос хамааралгүйгээр бидэнтэй учирдаг нэг хүн бол “удирдлага (manager) буюу дарга (boss)”. Гэхдээ энэ хүмүүстэй ч гэсэн бид ажлын ахын маань хэлдэгтэй агаар нэг сэтгэхүйгээр “Даргын ажил бүтвэл, миний ажил бүтнэ” тиймээс ухаантай, санаачлагатай хамтран ажиллах хэрэгтэй гэж аль 1980 онд Harvard Business Review-ээс зөвлөсөн байдаг юм байна. Үүнийг Англиар “manage up” гэж томъёолсон байх ба Монголоор “удирдлагаа удирдах ухаан” гэж болмоор санагдав.

Энэхүү ухааныг амьдралд хэрхэн хэрэгжүүлэх талаар экспертүүдийн зөвлөснийг хураангуйлбал:

  • Удирдлагаа сайн таньж мэд: мэдээллийг ямар байдлаар авах дуртай (жишээлбэл: зурган, бичгэн, аман танилцуулганы алийг нь илүүд үздэг), үл ойлголцол маргаантай асуудлыг хэрхэн шийдвэрлэдэг, ер нь тухайн хүний давуу болон сул тал юу вэ гэдгийг эртнээс мэддэг байх нь цаашдаа дарга, цэрэг аль алиндаа амар байдаг. Мөн үе үе даргынхаа оронд өөрийгөө тавьж, аливааг түүний нүдээр харахыг хичээх нь удирдлагуудаа ойлгож, тэдэнтэй илүү гар нийлэн ажиллахад тустай байдаг.
  •  Өөрийнхөө биш даргынхаа ажлыг хөнгөвчил: Удирдлагаа удирдах ухаан гэдэг нь өөрөөсөө түрүүнд даргыгаа ажилдаа амжилттай, хамт олныхоо дунд гялалзахад нь туслах. Ингэснээр удирдлага тань эргээд таныг ажилдаа амжилттай, карьертаа ахиж дэвшихэд тань тусалдаг.
  • Даргынхаа сул болон давуу талыг нөхөж ажилла: Төгс хүн гэж байдаггүйчлэн төгс дарга гэж байдаггүй. Иймд тэдний сул талыг таньж мэдсэнээр түүнийг нь нөхөн ажиллахад онцгой ач холбогдол өг. Ингэснээр дарга чинь чиний ач холбогдол, үнэ цэнийг илүү мэдэрнэ.
  • Юм бүхэнд урдуур нь бүү ор: Гуравдугаарт бичсэн зөвлөгөөг дагахаасаа урд дарга чинь чиний тусламжийг авахдаа дуртай байна уу үгүй юу гэдгийг эхэлж тодруулсан байх хэрэгтэй. Үгүй бол чиний хэн, хэнийхээ хэргийг бүтээхээр удирдлагаа удирдах гэсэн ухаан чинь даргынхаа суудалд санаархсан оролдлого мэт санагдаж болзошгүй.
  • Удирдлагатай чинь холбоотой ямар нэгэн асуудал тулгарвал хамгийн түрүүнд удирдлагатайгаа л ярилц: Ажилаа амжилттай ахиулахад тулгарч буй асуудлуудын талаар даргатайгаа илэн далангуй ярилцаж бай, эдгээр асуудалд түүний удирдлагын арга барил ч багтана.

Монголчууд өөрөө идэвхи, санаачлага гарган даргатайгаа харилцаж, ойр ажилладаг хүмүүсийг нэлэнхүйд нь бялдууч, зусарч, долигнуур гэж дургүйцдэг. Гэтэл тэд чинь ажил мэргэжилдээ амжилт гаргах чиглэлээр зөвлөдөг топ экспертүүдийн хэлснээр “удирдлагаа удирдах ухаан”-тай хүмүүс юм биш үү, хэтрүүлчихгүй л бол 🙂

Эх сурвалж: http://www.ivankatrump.com

June 24, 2016

Админ

Educated highlights

ЯМАРЧ УУЛЗАЛТ, ЯРИА, ХЭЛЭЛЦЭЭРИЙГ ЭЕРЭГЭЭР ТӨГСГӨХ 3 АРГА

ЯМАРЧ УУЛЗАЛТ, ЯРИА, ХЭЛЭЛЦЭЭРИЙГ ЭЕРЭГЭЭР ТӨГСГӨХ 3 АРГА 0

Алдарт Harvard Business Review – ээс хувийн болон хувьсгалын чанартай ямарч уулзалт, яриа, хэлэлцээрийг эерэгээр төгсгөж, дараа нь амаа барьсан ааш авир гаргахгүй байхад тань туслах дараах 3 аргыг зөвлөжээ. Анхааралтай уншаад, амьдрал ахуйдаа хэрэгжүүлээрэй.

1. Тэвчээрийн хязгаараа мэд: Тархинд тань эсэргүүцэл, дургүйцлийн гэрэл асч, ямар нэгэн таагүй үгс амаар тань гарахаас өмнө биеэ сайн хянаж ажигла. Хэн нэгний тэвчээр барагдаж эхлэх үед түүний зүрхний цохилт түргэсч, нүүр нь улайж, амьсгал нь давхцах нь олонтаа байдаг. Ийм шинжүүд та хэн нэгэнтэй ажлын ч бай, амин хувийн ч бай яриа өрнүүлж байхад илэрвэл таны тэсвэр алдагдаж, дургүйцэл бухимдлаа хурц хэлбэрээр гаргах гэж байгаагийн дохио байх магадлал өндөр. Та өөрийгөө ажиглаж, хянахаас гадна харилцан ярилцагч чинь гараа элгэндээ тэврэх, биеэ хөндөлдүүлэх, яриа нь түргэсч, чангарах зэрэг байдал ажиглагдвал тэр хүн тэвчээрийн хязгаартаа ойртож байгаагийн дохио байх өндөр магадлалтайг мөн анхаараарай.

2. Байдал хурцдаад ирвэл анхаарлаа өөр зүйлд хандуул: Харилцан ярилцагчдын аль нэг тал нь тэсвэр тэвчээрээ алдах магадлал өндөрссөн тохиолдолд хамгийн түрүүнд гүн амьсгаа аваарай. 4-7-8 буюу 4 тоотоор амьсгаагаа аваад, 7 тоотод бариад, 8 тоотоор гаргахад хүн ямар ч хүнд байдлаас өөрийгөө хөнгөхөн аваад гарах чадвар нэмэгддэг гэж Andrew Weil гэгч эмч зөвлөжээ. Мөн байдал хурцдаад ирвэл ярилцаж байгаа зүйлдээ бус ойр хавьдаа байгаа ханын зураг, цаг зэрэг обьект руу анхаарлаа шилжүүлэх юмуу ширээн дээр гараараа тулах зэргээр бодит зүйлсийг мэдэрвэл тархинд ассан эсэргүүцэл бухимдлын гэрлэн дохио унтрахдаа түргэн байдаг.

3. Харилцан ярилцагчаа үнэн сэтгэлээсээ ойлгохыг хичээ: Аливаа харилцан яриа, уулзалт, хэлэлцээнд хэн илүү ярьснаас илүү хэн илүү сонсож ярилцагч талынхаа яг юу хүсч, юу санааг нь зовоож байгааг ойлгосон нь илүү үр дүнд хүрэх нь түгээмэл. Ингэхийн тулд:
– ярилцагчдаа түүний тулгарсан асуудлыг хамтдаа шийдэхийг хүсч буйгаа хэлж,
– урд нь та өөрөө ямар нэгэн буруутай үг хэлж, үйлдэл гаргасан бол түүнийгээ хүлээн зөвшөөрч,
– санал нийлэхгүй ч бие биедээ хүндлэлтэй хандаж,
– харилцагчийнхаа байр суурийг ухаж ойлгохын тулд “яагаад …” гэсэн тодруулга авч,
– нэг нэгнийхээ талаар илүү мэдээлэлтэй болохыг зөвлөжээ.

Эдгээр аргыг хэн нэгэнд яах гэж тийм үг хэлэвдээ гэж амаа бариад сууж байгаа хүмүүс ч нөгөө хүнтэйгээ ахиж уулзаад хэрэглэн, ажил ч бай, амин хувийн ч бай харилцаагаа аварч үлдэх боломжтой шүү. Дээрхээс өөр амьдрал дээр туршигдаж батлагдсан аргууд мэддэг нэг нь хуваалцаарай 😉

June 21, 2016

Админ

BusinessEconomy

БИЗНЕС ЭРХЛЭХЭД ЗААВАЛ ИХ МӨНГӨТЭЙ БАЙХ ШААРДЛАГАГҮЙ

БИЗНЕС ЭРХЛЭХЭД ЗААВАЛ ИХ МӨНГӨТЭЙ БАЙХ ШААРДЛАГАГҮЙ 0

Дэлхийн томоохон санхүүгийн нэгдлүүдийн нэг Credit Suisse-ийн захирал Urs Rohner санхүүгийн салбарт fintechs (товчоор, financial technology start-ups) хэрхэн хувьсал хийж байгаа, мөн эдгээр fintechs-тэй уламжлалт банк, санхүүгийн байгууллагууд хамтран ажиллах нь хэн хэндээ хожоотой байх талаар бичсэн нийтлэлээс технологийн эрчимтэй хөгжлийн үр нөлөөгөөр бизнес эхлэх/эрхлэхтэй холбоотой түгээмэл ойлголтууд мөн хэрхэн хувьсан өөрчлөгдөж байгааг харж болохоор байна. Rohner-ын дэвшүүлсэн санаануудад хийсэн өөрийн дүгнэлтийг нэгтгэвэл:

– Бизнес эхлэх/эрхлэхэд өөрийн хөрөнгө нь хүрэлцэхгүй байгаа хүмүүс заавал банк санхүүгийн байгууллагаас зээл авч, өр тавих шаардлагагүй болж байна. Үүний тод жишээ нь https://www.kickstarter.com/ бөгөөд энд эхлэх гэж байгаа юмуу өргөжүүлэх гэж байгаа бизнесийн санаагаа видео хэлбэрээр танилцуулж ирээдүйн хэрэглэгчдээсээ урьдчилан төлбөрийг нь авч, хөрөнгө босгон (crowd-funding/financing) санаагаа бодитоор хэрэгжүүлэх боломжоор хангагддаг.

– Мөн бизнесээ эхлэх юмуу өргөжүүлэх зорилгоор заавал банкнаас хүүтэй зээл авах бус бие даасан хөрөнгө оруулагчдыг өөрийн бизнестээ хувь эзэмшүүлэх зэрэг харилцан тохиролцсон уян хатан нөхцөлтэйгээр хөрөнгө босгох боломж улам өргөжиж байна. Эдгээр хөрөнгө оруулагчид өөрийн сүлжээгээ ашиглан зөвхөн санхүүгийн биш, үйл ажиллагаа, маркетинг гэх мэт чиглэлүүдээр хөрөнгө оруулсан бизнесүүддээ тусалж дэмждэг ба тэд банк санхүүгийн байгууллагууд шиг барьцаа нэхдэггүй. Иймд тэднийг venture capitalists, angel investors зэргээр нэрлэдэг. Fintechs эдгээр хөрөнгө оруулагчдын үйл ажиллагаанд суурилсан мэдээллийн бааз хүртэл гаргадаг болсон.

– Уламжлалт банк санхүүгийн байгуулагууд хэдэн 100-н жилийн турш оршин тогтнож байгаа учир тэднийг зохицуулдаг хууль, эрх зүйн орчин төлөвшсөн. Харин fintechs, бие даасан хөрөнгө оруулагчид гэдэг ойлголтууд харьцангуй шинэ учир тэднийг зохицуулдаг хууль эрх зүйн орчин үүсээгүй буюу АНУ зэрэг улсад дөнгөж үр хөврөлийн үедээ явж байгаа.

Эх сурвалж: “Why partnerships are appealing”, McKinsey & Company.

June 20, 2016

Админ

International SMEs

ДЭЛХИЙН ГАЗРЫН ЗУРГИЙГ ӨӨРЧЛӨХ ЦАГ БОЛСОН

ДЭЛХИЙН ГАЗРЫН ЗУРГИЙГ ӨӨРЧЛӨХ ЦАГ БОЛСОН 0

Өмнө нь та бүхэнд танилцуулсан нэр нөлөө нь хурдтай өсч буй глобал стратегич Parag Khanna-тай түүний шинэ ном Connectography: Mapping the Future of Global Civilization-ий хүрээнд Washington Post болон Next City-ээс хийсэн ярилцлагуудад дэлхийн хөгжлийн чиг хандлага хаашаа явж байгаа, улс орнууд ялангуяа АНУ дэлхийн хөгжлийн шинэ хандлагууд, шинэ норм хэв маягуудтай уялдуулан төрийн бодлогоо хэрхэн өөрчлөх хэрэгтэй талаар түүний дэвшүүлсэн гол санаануудыг тоймловол:

• 2030 он гэхэд дэлхийн нийт хүн амын 70 орчим % нь томоохон хотуудад амьдарна. Тэгэхээр улсын хөгжлийн бодлогоос хотуудын хөгжлийн бодлого илүү ач холбогдолтой болно.

• Дэлхийн хүн амын 1% нь бусад 99%-ийнхаа хэрхэн амьдрахыг тодорхойлдог. АНУ Хятад Улсад үйлдвэрийн баазуудаа алдаад дууслаа гэж гоншигнож байхын оронд Silicon Valley зэрэг шинэ санаа, шилдэг бүтээлүүдийн өлгий газрууддаа тулгуурлан энэ 1%-ийг илүү манлайлах хэрэгтэй.

• Дэлхийд илүү олон цэрэг байлдааны нөөцтэй улс нь биш илүү олон дэд бүтцийн сувгийг удирддаг улс нь хүчтэй байдаг болно. БНХАУ өөрийн газар нутаг төдийгүй хөрш зэргэлдээ улсуудаа дэд бүтцийн нэгдсэн сүлжээнд алсын хараатай нэгтгэж байгаа нь дээр дурдсан хүчний хувьслыг олж харсны илрэл. Энэ бодлогоо хэрэгжүүлэх гол механизм нь саяхан байгуулагдсан Asian Infrastructure Investment Bank (AIIB). Энэ нь нэг талаас тэднийг илүү хүчирхэг болгох ч нөгөө талаас бусдаас илүү хараат болгоно. Гэхдээ аль болох дэд бүтцийн сүлжээнд илүү холбогдох тусам улс орнууд аль аль нь хожиж байдаг.

• Глобалчлал улам хүчээ авна. Гадаадад цагаачлагчдын тоо, чөлөөт худалдааны хэлэлцээрүүдийн агуулга, технологийн цар хүрээ улам нэмэгдэнэ. Ийм үед АНУ-ын Ерөнхийлөгчид нэр дэвшигч Trump бид гадаадын цагаачдыг нутаг буцаана, Хятадад бараа таваараа үйлдвэрлэж байгаа компаниудыг эргээд дотооддоо үйлдвэрлэлээ явуулахыг шахах болно зэрэг дэлхийн хөгжлийн чиг хандлагын эсрэг зүйл ярьж байгаа нь шүүмжлүүштэй.

• Дэлхийн дулаарал энэ хэвээрээ үргэлжилж, дэлхийн дундаж температур целсийн 4 хэмээр нэмэгдвэл АНУ, БНХАУ, Бразил, Энэтхэг, Австрали гэх мэт орнууд дэлхийн хоол хүнсний голлох үйлдвэрлэгч/нийлүүлэгч статусаа ОХУ, Канад зэрэг хойд туйлтай ойрхон орнуудад алдана.

Parag Khanna болж байгаа бодит үйл явцад үнэлэлт дүгнэлт хийн, энэ үйл явцаас хэрхэн өөрт эдийн засгийн хожоотой үйлдлүүдийг хийх талаар санаа дэвшүүлдэг судлаач юм гэж ойлголоо. Харин миний бие болж байгаа үйл явцыг хэрхэн эерэг тал руу нь хөтөлж, эдийн засгийн бус байгаль орчин, нийгмийн хожоотой нүүдлүүдийг хийх вэ гэдэг шинэ үеийнхний хариулах ёстой илүү чухал сэдэв гэж ойлгодог. Иймд энэ сэдэвтэй холбогдох шилмэл нийтлэлийг удахгүй хураангуйлан хүргэнээ.

June 19, 2016

Админ

International SMEs

АНУ, БНХАУ: АЛЬ НЬ ИЛҮҮ “SEXY” ВЭ?

АНУ, БНХАУ: АЛЬ НЬ ИЛҮҮ “SEXY” ВЭ? 0

Сингапурын Үндэсний Их Сургуулийн харъяа Ли Куан Юугийн нэрэмжит Төрийн бодлогын сургууль (Lee Kuan Yew School of Public Policy)-ийн декан Kishore Mahbubani Өмнөд Хятадын тэнгисийг тойрсон газар нутгийн маргаантай холбоотой олон нийтлэл бичсэний нэг нь энэ.

Энэхүү нийтлэлийн гол санаа нь БНХАУ Өмнөд Хятадын тэнгис (South China Sea) дэхь тодорхой арлуудыг ямар ч олон улсын байгууллага, хоёрдогч гуравдагч улстай хэлэлцэн зөвшилцөлгүй өөрийн мэдлийнх хэмээн зарлаж, хөлөг онгоцуудаа илгээн, өрөмдлөг зэрэг үйл ажиллагаа явуулж эхэлснээр Вьетнам, Филиппин зэрэг Зүүн Өмнөд Азийн зарим орнуудтай үл ойлголцолд хүрч, хоорондоо тун сөрөг уур амьсгалтай байгаа. Үүнд АНУ, БНХАУ-ыг буруушааж байлдааны хөлөг онгоцуудаа тус газар нутгууд руу илгээн, тэдгээр нь БНХАУ-ын өөрийн эзэмшлийн гэж зарласан арлуудын 22км-ийн диаметрээс дотогш орсон тохиолдол гарчээ. НҮБ-ын Тэнгисийн Хуулийн Конвенцэд /UNCLOS/ зааснаар ямар нэг улсын харъяа арал, тэнгисийн эргээс 22км /12 nautical mile/ диаметр доторх хэсгийг тус улс өөрийн эзэмшлийнх хэмээн зарлах боломжтой. Тэгэхээр АНУ-ын дээр дурдсан үйлдлийг БНХАУ өөрийнх нь газар нутаг, тусгаар тогтнолд заналхийлсэн үйлдэл хэмээн ноцтой хариу үзүүлэх боломж нэг талаар бүрдсэн.

Нөгөө талаар АНУ-аас БНХАУ ямарч олон улсын хэлэлцээ, харилцан ойлголцолд хүрээгүй байж дур мэдэн Өмнөд Хятадын тэнгис дэхь арлуудыг өөрийн мэдлийнх хэмээн зарласан нь олон улсын гэрээ конвенцийг зөрчиж байна гэсэн мэдэгдэл гаргасан нь бас л зөв гэжээ.

Mahbubani энэ нийтлэлдээ дэвшүүлсэн гол санаа нь АНУ өөрөө далай тэнгисийн асуудалтай холбоотой олон улсын хамгийн түгээмэл баримт бичиг болох UNCLOS-д нэгдээгүй байж бусад улсыг энэ баримт бичгийн заалтуудыг мөрдөхийг шаардаж байгаа нь зохисгүй юм гэжээ. Дэлгэрэнгүйг дараах нийтлэлээс…

Эх сурвалж: http://www.straitstimes.com/opinion/red-alert-a-new-geopolitical-haze

June 18, 2016

Админ

Educated highlights

S/HE – ТӨГС ЗОХИЦОХ ХОС ЧИНЬ МӨН ҮҮ?

S/HE – ТӨГС ЗОХИЦОХ ХОС ЧИНЬ МӨН ҮҮ? 0

Хосуудын харилцааны эксперт Talia Goldstein хосууд хоорондоо төгс зохицох эсэхээ дараах 4 асуултын дагуу шинжихийг зөвлөжээ. Харин аль хэдийн гэрлэсэн хосууд дараах асуултуудыг анхааралдаа авч, өөрсдийн харилцаандаа засаж, сайжруулах зүйлс байвал санаа авбал зүгээр юм байна.

1. Аялах хэв маяг чинь төстэй юу? Чухал аялалаа хаашаа, хэрхэн, хэдий хугацаагаар явах зэргээ хамтдаа төлөвлөж эхлэхээс л хосууд нэг нэгнийхээ амьдралын хэв маяг зэргийг сайтар мэдэж авах боломжтой байдаг. Жишээ нь хосын нэг нь Монголчилбол Увс аймаг руу майхнаар хоноглон, өөрсдөө хоолоо хийн, ууланд алхаж адал явдлаар дүүрэн аялалд гарахыг хүсч байхад нөгөөх нь Тэрэлжид 5 одтой зочид буудалд тухалж байгаад ирэхийг илүүд үзэж болно. Энэ тохиолдолд хосын хэн нэгнийх нь буруу зөв биш зүгээр л тэд амьдралын өөр хэв маягтай, өөр зүйлээс таашаал авдаг хүмүүс байж болно. Гэр бүл болсон хойно амьдрах байр, унах машин, хүүхдүүдээ явуулах сургууль гэх мэт илүү чухал зүйлсийг сонгоход дээрх ялгаа мөн гарч, илүү том асуудал үүсгэж болзошгүй.

2. Хамтдаа хийх дуртай зүйлстэй юу? Хосуудын хобби төстэй байх тусам төгс зохицох магадлал өндөрсдөг. Энэ нь заавал адилхан хамтлагийн дуу сонсдог байх тухай биш. Зүгээр л хосууд хамтдаа хийх дуртай 2-3 хобби/сонирхолтой байвал тун сайн. Жишээ нь хамтдаа ууланд алхах, ижилхэн спортын тэмцээн хөгжөөн дэмжих гэх мэт. Ингэснээр хосууд хамтдаа байхдаа цагийг утгаар нь “сайхан” өнгөрөөж чаддаг байна.

3. Бие биенээ нөхөж чаддаг уу? Ижил цэнэгүүд түлхэлцэж, эсрэг цэнэгүүд таталцдаг физикийн хууль хосуудын зохицолд ч мөн адил үйлчилдэг. Тухайлбал хос 2 хоёулаа маш оргилуун, дүрэлзсэн зантай, эсвэл хоёулаа дуугүй, илэн далангуй биш дотогшоогоо хүмүүс байвал тэдний харилцаа хол явах нь эргэлзээтэй гэж Goldstein дүгнэжээ.

4. Энэ харилцаанд байснаар чи эерэгээр хувьсан өөрчлөгдөж чадаж байна уу? Хосууд хамтдаа байхдаа өөрийнхөөрөө байж чаддаг, мөн нэг нэгнээ эерэгээр өөрчилж, урд урдынхаасаа илүү хөгжин дэвжсэн хувь хүн болоход нь дэмжиж чаддаг байвал тэд төгс зохицдог.

Эх сурвалж: “A relationship expert reveals 4 signs that you’re a perfect match”, Business Insider

June 15, 2016

Админ

International SMEsEducated highlights

ДЭЛХИЙН ХЭЛЭНД ЗАЙЛШГҮЙ НЭМЭХ ШААРДЛАГАТАЙ 16 ҮГС

ДЭЛХИЙН ХЭЛЭНД ЗАЙЛШГҮЙ НЭМЭХ ШААРДЛАГАТАЙ 16 ҮГС 0

Хэдэн жилийн өмнө нэг нөхөр Монгол улсыг “Minegolia” гэдэг, Хятад эдийн засгийн глобалчлалын бодлогынхоо хүрээнд 10-20 жилийн дотор л энэ улсыг худалдаад авчихна гэж мэдэгдээд олон Монголчуудын эгдүүцлийг хүргэж байсан. Энэ нөхрийг Parag Khanna гэдэг ба олон улсад нэр хүнд нь хурдацтай өсч буй олон улсын харилцааны эксперт, геополитикийн стратегич хүн юм байна. Тэрбээр судалгааныхаа үр дүнг бусдын сонирхлыг татахуйцаар танилцуулахдаа гаргууд санагдлаа. Жишээ болгож саяхан нийтлүүлсэн, дэлхийн иргэд үгийн сандаа зайлшгүй нэмэх шаардлагатай гэж буй 16 үгийн тайлбарыг нь хуваалцая. Эдгээр үгийг 3 бүлэгт хувааж болмоор юм. 1-т. Технологи, 2-т. Дипломат ёс, 3-т. Мега хотууд.
1. Технологи: Энэ бүлэгт хамаарах үгсээс надад хамгийн сонирхолтой санагдсан нь Technology Quotient /TQ/ байв. Нилээд хэдэн жилийн өмнө Ц.Дэмбэрэл гуай Intelligence Quotient /IQ/ буюу оюуны итгэлцүүрийн талаар манайд танилцуулж, түүний ач холбогдлыг ойлгуулснаас хойш энэ тухай хүн бүхэн мэддэг болсон. Сүүлийн жилүүдэд Emotional Quotient /EQ/ буюу сэтгэл хөдлөлөө удирдах чадварыг хүний ажил, амьдралд IQ-ээс илүү чухал хэмээн олон улсад ярьж, бичих болсон. Харин Parag Khanna IQ, EQ-ээс гадна TQ буюу технологийн талаарх мэдлэг, түүнийг хэрэглэх чадварыг үнэлэх шаардлага ойрын ирээдүйд бий болно гэжээ.
2. Дипломат ёс: Энэ нийтлэлээс нь гадна, түүний De Facto нэвтрүүлэгт өгсөн ярилцлагыг нь үзсэний дараа шинээр хэрэглээнд оруулахыг санал болгож буй “multi-alignment” буюу олон талт харилцаа хэмээх ойлголт нь Монгол улсын тухайд “олон хөршийн бодлого” гэж буулгаж болохоор санагдав. Манайх гуравдагч хөршийн бодлого гээчийг хэрэгжүүлээд АНУ, Япон, Турк зэрэг орнуудыг гуравдагч хөршөө хэмээн тусгайлан харилцах болсон. Гэтэл эдгээр улс нь бид хүссэн ч эс хүссэн ч мөнхийн 2 хөрш маань байх БНХАУ, ОХУ нарын төдийлэн үзэл бодол таардаггүй улсууд байх. Энэ мэт шалтгааны улмаас улам хурдацтай глобалчлагдаж буй өнөө цагт Parag Khanna-ийн санал болгож байгаачлан “олон хөршийн бодлого”-той байх нь илүү онох мэт.
3. Мега хотууд: Тэрбээр нэгэн TED илтгэлдээ дэлхийн нийт эдийн засгийн эргэлтийн 90% нь New York, London, Shanghai, Singapore зэрэг 40-хөн мега хотын хооронд хийгдэж байна гэж. Эдгээр мега хотууд хоорондоо дипломат харилцаа /diplomacity/ тогтоож, глобалчлалыг утгаар нь хөгжүүлж байгаа зэргээс хамааран Pax Urbanica буюу Их хотын иргэд хэмээх шинэ нэр томъёог дэлгэрүүлэх нь зүйтэй гэжээ. Энэ чинь харин Монгол хэлэнд аль хэдийн нэвтэрсэн хэллэг байна шүү.
Parag Khanna-гийн нийтлэлийг өөрийнхөөрөө хураангуйллаа. Та бүхэн бүтнээр нь уншаад, өөрийн санал бодлоо хуваалцаарай.

Эх сурвалж: http://www.techinsider.io/words-describing-humanitys-future-that-english-needs-2016-5

June 13, 2016

Админ

International SMEsConsulting

ТА АМЖИЛТТАЙ ЯВАА ХҮН МӨН ҮҮ?

ТА АМЖИЛТТАЙ ЯВАА ХҮН МӨН ҮҮ? 0

Linkedin-ийн Нөлөөлөгч /Influencer/ Travis Bradberry амжилттай хүн гэж аль болох их, үнэ өртөгтэй материаллаг зүйл цуглуулж, хуримтлуулсан хүнийг биш харин дараах 9 шинжийн аль болох олныг өөртөө агуулсан хүнийг хэлнэ гэж бичжээ. Эдгээр 9 шинж чанарт: Аливаа зүйлийн сайн талыг үргэлж харж чаддах байх, бусдын амжилтанд үнэн сэтгэлээсээ баярладаг байх, амьдралд нь тулгарсан асуудалд хэн нэгнийг буруутгах биш өөрөө эзэн болж хариуцлага хүлээж чаддаг байх зэргийг багтаажээ.

Бидний амжилтыг хэмжих түгээмэл нэгж болгодог боловсролын түвшин, эд баялгийн хэмжээ зэргийг огт чухалчлаагүй түүний энэхүү нийтлэл маш олон хүний анхаарлыг татсан байх юм. Тэрбээр хэн нэгний амжилт түүний гадна бус, дотор оршдог гэсэн ба энэхүү санаагаа дараах судалгаагаар дэмжиж. Strayer их сургуулиас хийсэн судалгаагаар Америкчуудын 90% нь амжилт бол эрх мэдэл, эд хогшил, нэр алдраас илүү өргөн хүрээтэй ойлголт гэж итгэдэг байна. Үүнийг лавшруулбал, судалгаанд оролцогсдын 67% нь амжилт гэж “гэр бүл, найз нөхөдтэйгээ сайхан харилцаатай байх”-ыг хэлнэ гэсэн ба 60% нь амьдралаа авч явдаг ажилдаа чин сэтгэлээсээ дуртай байх гэж хариулжээ. Эдгээр хүмүүсийн ердөө 20% нь мөнгөөр хэмжигдэх эд баялагаар амжилтыг тодорхойлно гэж.

Монгол шиг материаллаг эд зүйлсээр хүний амжилтыг тодорхойлох хандлага давамгайлдаг нийгмийн бүтээгдэхүүн бидэнд уншиж, тунгаахад хэрэгтэй нийтлэл байна. Уншаад, тунгаагаарай.

Эх сурвалж: https://www.linkedin.com/pulse/signs-youre-successfuleven-doesnt-feel-like-dr-travis-bradberry